Caicedo Yusoko Lakua eta Arreo KBE, eta Añanako Diapiroko biotopo babestua - natura2000

Gune hau Euskal Autonomia Erkidegoko laku natural bakarra da. Arabako Haranen eskualdean dago, eta lurralde horretan muinoak eta haran eta trokarte txikiak txandakatzen dira. Itsasoaren mailatik 650 metroko altitudean kokatzen da eta iturburu gazi batek osatzen duen elikadura arro txiki bat dauka. Ur azalera 15 ha ingurukoa da, eta sakonera 25 m ingurukoa. Inguruko paisaiaren orografia irregularra da, Añanako diapiroaren eta kanpoko eragileen ondorioz. Nekazaritza lursailak daude lakuaren inguruan, eta muino txikien magaletan baso mamitsu eta hostotsuak. Horietan nagusi dira erkameztiak eta artadiak. Jatorri geologikoari dagokionez, aintziraren hondoan zeuden material bigunak disolbatzean eta higatzean sortu zen lakua; gainera, diapiroak zeharkatzen dituen akuiferoak azaleratzen dira hor.

Zergatik den garrantzitsua

Leku hau Euskal Autonomia Erkidegoko laku sistema iraunkor bakarra da. Añanako diapiroaren aldamenean dago, eta diapiro horretan du bere jatorria. Landareria askotarikoa da, eta lakuaren inguruan erkametzez eta artez osaturiko baso mediterraneoak dira nagusi. Lakuaren inguruan zingira landareak daude; landaretza hori ondoz ondoko zerrendatan hazten da hezetasun edafikoaren arabera, kanpoaldetik (larreak eta ihiak) barrualderaino (lezka arruntak eta lezka hostoestuak). Ikuspuntu botanikotik, iturburu gaziari lotutako espezie halofilo bereziak daude. Leku horretako interes faunistikoa urari lotutako espezieetan datza, uretako hegaztiek lakuan habiak egiten dituztelako eta negua ere han igarotzen dutelako. Horrez gain, anfibioen ugalketarako leku garrantzitsua da, eta zenbait espezie oso kopuru handitan elkartzen dira bertan.